B’xhieda tal-impenn imġedded tal-Kummissjoni lejn il-komunitajiet rurali u l-iżvilupp taż-żoni rurali, din il-Komunikazzjoni tipproponi Pjan ta’ Azzjoni Rurali. Din se:
- trawwem l-koeżjoni territorjali u joħolqu opportunitajiet ġodda biex jattiraw negozji innovattivi;
- tipprovdi aċċess għal impjiegi ta’ kwalità;
- tippromwovi ħiliet ġodda u mtejba;
- tiżgura infrastruttura u servizzi aħjar;
- isfrutta r-rwol tal-agrikoltura sostenibbli u l-attivitajiet ekonomiċi diversifikati.
Il-parti tematika tiegħu hija strutturata skont l-erba’ blokok ta’ azzjonijiet u hija artikolata madwar disa’ inizjattivi ewlenin u 15-il azzjoni ta’ akkumpanjament.
Kull azzjoni se ġġib flimkien oqsma ta’ politika differenti tal-UE biex twettaq il-viżjoni, u l-għanijiet komuni tagħha.
Sitt azzjonijiet trasversali jikkompletaw l-istampa.
Żoni rurali aktar b’saħħithom
Iż-żoni rurali għandhom jilqgħu komunitajiet lokali vibranti u mogħtija s-setgħa. Li n-nisa u l-irġiel ilkoll ikunu jistgħu jieħdu sehem attiv fil-proċessi tal-politika u tat-teħid ta’ deċiżjonijiet, li jiġu involuti firxa wiesgħa ta’ partijiet ikkonċernati u ta’ networks kif ukoll il-livelli kollha ta’ governanza huwa kruċjali għall-iżvilupp ta’ soluzzjonijiet ta’ politika u investimenti mfassla apposta, ibbażati fuq il-post u integrati.
Soluzzjonijiet innovattivi għall-fornimenti tas-servizzi għandhom jiġu żviluppati wkoll biex jagħmlu l-aħjar użu mill-possibbiltajiet offruti mill-għodod diġitali u jħeġġu bil-kbir innovazzjoni soċjali.
Żoni rurali konnessi
L-iżvilupp ulterjuri taż-żoni rurali jiddependi fuq li dawn ikunu konnessi tajjeb bejniethom u maż-żoni periurbani u urbani. Dan jagħmilha aktar faċli biex dawn jintlaħqu filwaqt li jittejjeb l-aċċess għal firxa usa’ ta’ servizzi għall-komunitajiet lokali.
Iż-żamma jew it-titjib tas-servizzi u l-konnessjonijiet tat-trasport pubbliku, kif ukoll it-tisħiħ tal-infrastrutturi diġitali, huma essenzjali biex jiġu żgurati żoni rurali tal-UE konnessi aħjar.
Żoni rurali reżiljenti
Il-preservazzjoni tar-riżorsi naturali, ir-restawr tal-pajsaġġi, inklużi dawk kulturali, l-ekoloġizzazzjoni tal-attivitajiet tal-biedja u tal-ktajjen tal-provvista se jagħmlu ż-żoni rurali aktar reżiljenti għat-tibdil fil-klima, għall-perikli naturali u għall-kriżijiet ekonomiċi. Bħala fornituri ta’ servizzi li jipproteġu l-ekosistemi u s-soluzzjonijiet għan-newtralità karbonika, iż-żoni rurali għandhom rwol ewlieni x’jaqdu fit-tranżizzjoni ekoloġika.
It-tranżizzjonijiet ekoloġiċi u diġitali għandhom ikunu ġusti u jqisu l-ħtiġijiet tal-membri kollha tal-komunità rurali, inklużi dawk minn gruppi żvantaġġjati biex tissaħħaħ ir-reżiljenza soċjalii taż-żoni rurali. Biex iż-żoni rurali jsiru aktar reżiljenti soċjalment jeħtieġ li jsir użu mill-firxa sħiħa ta’ talenti u mid-diversità fis-soċjetà tagħna.
Żoni rurali prosperużi
Iż-żoni rurali jistgħu jsiru aktar għonja billi jiddiversifikaw l-attivitajiet ekonomiċi lejn setturi ġodda b’effetti pożittivi fuq l-impjieg, u jtejbu l-valur miżjud tal-attivitajiet tal-biedja u agroalimentari, il-foresterija u atttivitajiet oħra tal-bijoekonomija.
Id-diversifikazzjoni tal-attivitajiet ekonomiċi għandha tkun ibbażata fuq strateġiji ekonomiċi lokali sostenibbli inklużi miżuri li jagħmlu l-ambjent tagħhom attraenti għall-kumpaniji u jestendu l-litteriżmu diġitali. Hi teħtieġ ukoll l-għoti ta’ aċċess għall-edukazzjoni u t-taħriġ diġitali u ibridi biex il-komunitajiet jiksbu ħiliet ġodda u jappoġġjaw il-mentalitajiet intraprenditorjali.
